14
март
2026
14 наурыз – Көрісу күні-Амал мерекесі! «Ақ ниет – Амал шапағаты»
14 наурыз – Көрісу күні-Амал мерекесі! Бөбекжайда өткен «Ақ ниет – Амал шапағаты» атты шығармашылық кездесу кеші ұлттық құндылықтарды жаңаша сипатта дәріптеген тағылымды шара болды. Қонақтарды «Ақ босаға» рәсімімен ұлттық киімдегі педагогтер қарсы алып, әр ата-анаға ізгі ниетті білдіретін «Ақ тілек» лентасын ұсынды. Кеш барысында «Көрісу – жаңа жылдың басы» атты әсерлі сахналық көрініс арқылы дәстүрдің мәні көркем жеткізілді. Қатысушылар «Тілек ағашы – Амал шапағаты» арт-инсталляциясына жүрекжарды тілектерін жазып, бір-біріне жылулық сыйлады. Сонымен қатар, «Қара жорға» әуенімен орындалған көңілді флешмоб кештің ажарын аша түсті. «Ұлттық мұра – ұрпаққа аманат» отбасылық арт-фестивалінде ата-аналар мен балалар бірлесе ұлттық нақыштағы туындылар жасап, өз өнерлерін ортаға салды. «Амал келді – жыл келді!» квест-шоуында балалар ұлттық ойындар мен тапсырмалар арқылы салт-дәстүрді тереңірек таныды. Барлық шараларды біріктірген «Амал шапағаты» эмблемасы қатысушылардың бірлігін айқындап, ұлттық рухты асқақтата түсті.