«Өнермен өрілген ұстаздық жол»
Алматы облысы, Жамбыл ауданы, «Аққайың» бөбекжайының музыка жетекшісі Қараш Ләзат Қанағатқызы Қазақстан Республикасы Оқу-ағарту министрлігінің «Құрмет грамотасымен» марапатталды.
Бұл марапат — Ләзат Қанағатқызының тәуелсіз еліміздің рухани және әлеуметтік дамуына қосқан өлшеусіз үлесінің, кішкентай бүлдіршіндердің жүрегіне өнер нәрін сеуіп, эстетикалық тәрбие берудегі қажымас еңбегінің жемісі. Министр Ж. Сүлейменованың қолы қойылған бұл құжат ұстаздың кәсіби біліктілігі мен Отан алдындағы адал қызметінің жоғары бағасы болып табылады. Музыка тілімен ұлттық рухты жаңғыртып жүрген Ләзат Қанағатқызының еңбегі — жас мамандарға үлгі, ұжымға мақтаныш.
Құрметті Ләзат Қанағатқызы!
Сізді Қазақстан Республикасы Оқу-ағарту министрлігінің жоғары марапаты — «Құрмет грамотасымен» шын жүректен құттықтаймыз!
Музыка — жанның шипасы болса, Сіз — сол өнердің киесін бала жүрегіне жеткізуші алтын көпірсіз. «Аққайың» бөбекжайының қабырғасында атқарып жатқан әрбір игі ісіңіз, әрбір әуезді сабағыңыз бүгін мемлекеттік деңгейде мойындалып, лайықты бағасын алып отыр.
Сізге: шығармашылық шабыт пен толағай табыстар, шәкірттеріңіздің шыңдарды бағындыруын, отбасыңызға амандық пен баянды бақыт тілейміз!
Еліміздің рухани гүлденуіне қосып жатқан үлесіңіз еселене берсін! Марапатыңыз құтты болсын!
