23
май
2025
Жас аналар мектебі: Байқау «Мақал-сөздің азығы, жұмбақ – ойдың қазығы»
Жас аналар мектебі: «Аққайың» бөбекжайында өткен «Мақал — сөздің азығы, жұмбақ — ойдың қазығы» атты танымдық сайыс ерекше әсер мен мәнге толы болды.
Шараның негізгі мақсаты — ана мен бала арасындағы рухани байланысты нығайтып, қазақтың сөз өнеріне деген сүйіспеншілікті арттыру еді. Іс-шара салтанатты ашылуымен басталып, бүлдіршіндердің шат күлкісі мен ата-аналардың ықыласымен жалғасты. Құрметті қонақтар мен әділқазылар құрамында балабақша әдіскері Токтамысова Айгүл Орынбаевна және тәжірибелі тәрбиеші Джанаева Айгерім Мырзагелдіқызы төрелік етті. Жас аналар екі топқа бөлініп, ұлттық мұра саналатын мақал-мәтелдер мен жұмбақтар арқылы сайысқа түсті. «Мақалды жалғастыр» бөлімінде қатысушылар халық даналығын еске түсіріп, оның мағынасын ашып түсіндіруге тырысты. Бүлдіршіндер аналарға қолдау білдіріп, мақалдың жалғасын тауып, белсене қатысты. Жүргізуші оқыған жұмбақтарға дұрыс әрі тапқыр жауаптар айтылып, балалардың логикалық ойлауы мен тіл байлығы байқалды. Шара барысында әсем әндер шырқалып, ұлттық би «Торсық» орындалып, көрерменге тамаша көңіл күй сыйлады. «Сөз мерген» кезеңінде аналар «ана», «отбасы», «туған жер», «достық», «тіл» тақырыптарында мақал-мәтелдер айтып, терең мағынаға тоқталды. Балалар өз білген мақал-мәтелдерін ортаға салып, ана тілінің көркемдігін таныта білді. «Шығармашылық сәт» бөлімінде қатысушылар берілген затқа жұмбақ құрастыру арқылы тапқырлықтарын көрсетті. Әр топ бір-бірінің салған суретіне жұмбақ құрастырып, сахнада қызықты түрде таныстырды. Ұлттық ою-өрнекке байланысты сергіту жаттығуы балалар мен ата-аналарға қуаныш сыйлады. Қатысушылардың әрқайсысы белсенділік танытып, білімдерімен ғана емес, өнерлерімен де көзге түсті. Шара соңында әділқазылар сайыс қорытындысын жариялап, барлық қатысушыларды марапаттады. Жас аналар мен балдырғандар арнайы дипломдармен, алғыс хаттармен және қошеметпен марапатталды. Бұл танымдық кеш балалардың ой-өрісін кеңейтіп қана қоймай, ата-аналармен бірлескен жұмыстың маңызын айқын көрсетті. Іс-шара ұлттық тәрбие мен ана тілінің қадірін дәріптеудің тамаша үлгісіне айналды. Осындай тағылымды шаралар арқылы болашақ ұрпақтың бойында ұлтжандылық, парасаттылық пен рухани байлық ұяламақ.