01
октябрь
2025
«Әкем – асқар тауым!»
https://youtu.be/GKUjbC4AnCo
Бөбекжайда дене тәрбиесі нұсқаушысы С.Б.Дондагулованың ұйымдастыруымен Әкелер мектебінің жұмыс жоспары аясында «Әкем – асқар тауым!» атты ұлттық ойындарға негізделген отбасылық сайыс ерекше рухта өтті. Бұл шарада әкелер өз балаларына тірек, нағыз қамқоршы екендіктерін дәлелдеп, отбасылық құндылықтарды ұлттық дәстүрмен сабақтастыра білді. Сайыс барысында «Асау мәстек», «Такия салмақ», «Кім жылдам», «Теңге алу», «Бәйге», «Көтермек», «Арқан тартыс» сынды ойындар ойналып, әр әке өзінің ептілігі мен қайратына, мергендігі мен шапшаңдығына сын берді. Ұлттық ойындар арқылы жас буынға ата-бабамыздың өмір салты мен тәлімін жеткізу – сайыстың басты мақсаты болды. Әр ойын қатысушыларға қуаныш сыйлап қана қоймай, әке мен бала арасындағы сыйластықты, бірлікті, сенімді нығайта түсті. Шара соңында әкелердің жарқын көңіл-күйі, балалардың шат күлкісі мен көрермендердің қошеметі – отбасы мен ұлттық рухтың мәңгілік құндылық екенін тағы да айқындап берді.