30
март
2026
«Фито бар және балдың құпиясы»
Мектеп жасына дейінгі балаларға арналған «Мен зерттеушімін» танымдық-зерттеушілік республикалық байқауының аудандық кезеңіне «Алматы облысы білім басқармасының Жамбыл ауданы бойынша білім бөлімі» мемлекеттік мекемесінің «Аққайың» бөбекжайы КМҚК атынан қатысқан тәрбиеленушілер — Ержан Бекболат пен Ахыт Таңнұрым (4 жас). Жоба жетекшісі – тәрбиеші Иманкожаева Жанар Улкенбаевна. «Фито бар және балдың құпиясы» тақырыбындағы ұйымдастырылған танымдық-зерттеушілік әрекет барысында балалар табиғаттың адам денсаулығына тигізер пайдасымен танысып, шөптердің ерекше қасиеттерін қарапайым тәжірибе арқылы зерттеді. Тәрбиеші балаларды қызықты әңгіме мен ойын элементтері арқылы әрекетке тарта отырып, жалбыз бен түймедақтың хош иісі мен емдік қасиеттерін сезінуге мүмкіндік жасады. Әрекет барысында балалар шөптерді иіскеп, олардың иісін салыстырып, «жылы», «хош иісті», «ащы», «тәтті» сияқты сөздерді қолдана отырып, өз ойларын жеткізуге дағдыланды. Сонымен қатар, балдың дәмін татып, оның табиғи әрі пайдалы өнім екеніне көз жеткізді. Қарапайым тәжірибе жасау арқылы шөп пен балды біріктіріп, табиғи сусын дайындау кезінде балалар «араластыру арқылы өзгеріс болады» деген қарапайым ғылыми түсінікті тәжірибе жүзінде байқады. Ойын арқылы ұйымдастырылған бұл әрекетте балалар ауырып қалған кейіпкерге көмектесу арқылы қамқорлық пен мейірімділік сезімдерін көрсетті. Өз қолдарымен табиғи сусын дайындау барысында олар ерекше қызығушылық танытып, «мен жасадым», «мен көмектестім» деген жағымды эмоцияларға бөленді. Әрекет нәтижесінде балалар шөптердің адам денсаулығына пайдалы екенін түсініп, балдың тәтті әрі шайға қосылатын өнім екенін білді. Табиғи өнімдерді біріктіру арқылы дәмнің өзгеретінін байқап, қарапайым зерттеу дағдыларын меңгерді. Осылайша, балалардың танымдық қызығушылығы артып, табиғатқа деген сүйіспеншілігі қалыптасты.