«Беске дейін үлгеру» халықаралық бағдарламасы негізінде дайындалған Бейімделген бағдарлама туралы ақпараттық-түсіндіру жұмысы

Балабақшада педагогтерге және мектепке дейінгі тәрбиемен және оқытумен қамтылмаған балалардың ата-аналарына, консультация пункітіне келетін ата-аналарға  арналған «Беске дейін үлгеру» халықаралық бағдарламасы негізінде дайындалған Бейімделген бағдарлама туралы ақпараттық-түсіндіру жұмысы жүйелі түрде жүргізілді.

Ата-аналармен өткізілген жиналыстар мен жеке кеңестер барысында Minderoo қоры (Австралия) жүзеге асырып отырған «Thrive by Five» халықаралық бағдарламасының мәні мен маңыздылығы егжей-тегжейлі түсіндірілді. Бағдарламаның басты мақсаты – ата-аналардың педагогикалық мәдениетін арттыру арқылы балалардың ерте жастан жан-жақты дамуына қолдау көрсету екені атап өтілді.

Түсіндіру барысында ата-аналарға:

Сидней университетінің зерттеулері негізінде дайындалған мазмұнның ғылыми негіздері мен өзектілігі;

Баланың миының қарқынды дамуы алғашқы бес жасқа тиесілі екендігі;

Ата-ананың белсенді қатысуы мен қарым-қатынас орнатуы бала дамуына шешуші әсер ететіні;

Бағдарлама мазмұнының антропологиялық және нейробиологиялық зерттеулерге негізделгені, және әрбір елдің ұлттық ерекшелігіне сай бейімделгені туралы нақты ақпараттар берілді.

Сонымен қатар ата-аналарға балалармен тиімді өзара әрекеттесу, эмоционалдық қолдау көрсету, күнделікті тұрмыстағы даму мүмкіндіктерін байқау және пайдалану жолдары бойынша тәжірибелік кеңестер ұсынылды. Түсіндірме жұмыстары барысында бейнематериалдар көрсетіліп, интерактивті әдістер (сұрақ-жауап, жағдаяттық тапсырмалар) қолданылды.

Жалпы, ата-аналар Бейімделген бағдарламаның мазмұнымен танысып, оның маңызын түсінді. Олардан алынған кері байланыс бағдарламаның өзектілігі мен қажеттілігін растады.